FAIFEKAU A TE ATUA (#12224)

A Tou fakatasitasi-fealofani e se mafai o fakamatalagina, O toku Atua, kia latou katoa na loa ko latou ko la ko lavea a Ia Tela ko te Faifekau o Tou tafatasi mo te Aso-Malulu o Tou tafatasi.  So se tino tela e tofi ne ia se fili kia Ia, ko oti ne tofi ne ia se fili kia Koe, kae ko ia tela ko oti ne fakamau se taugasoa mo Ia ko oti ne fakatumau se taugasoa mo Koe.  E seai, e seai, e seai e mafai o teke atu a Koe i te foafoaaga katoatoa. A Koe ko oti ne fakamalugagina mai ite kamataga loa mai luga atu i so se mea e faka-paugina pela foki mo te kiloga.  A tou tafatasi ko oti ne fakaasi atu ne te tafatasi o Ia Tela ko te Malumalu o Tau Fakaasiiga.  So se tino tela e se-talitonu ki te mea tenei, ko oti ne fakapelo ne ia a Tou tafatasi, kae fakaloi a Koe ki Tou nofoaiga-a-aliki, kae lotomalie mo Koe i Tou lalolagi, kae se-fakalogo ki Au tulafono.  
 
Fesoasoani a Koe ki Au tavini, O toku Aliki, ke lavea a Tou tafatasi kae o fakalogo atu a Tou fakatasitasi, ko te mea ke mafai o fakatasi mai katoa i tafa i te mea te la e manako Koe ki ei i te Aso tenei te la a te laa o Tou uiga tonu ko maina atu mai i luga o te sikulagi o Tou finagalo, mo te masina of Tou tina tino ko oti ne fanaka mai i te Aso-Malulu i Tau fakatonuuga.  A Koe ko Ia, O toku Aliki, te la a Tena poto e seai se mea e sao mai i ei, kae ko ia te la e seai se tino e ana mafai-gina o taofi.  A Koe e fai a Tou fiafiaaga, mai i Tou nofoaiga-a-tupu te la e pulougina katoa a lalolagi katoa.  E iloa kii ne Koe, O toku Atua, a toku Fagasele Sili, me e seai se mea e mafai o fakagata ne ia a toku fia inu ona ko toku pokotia i te mavae mai ia Koe na loa ko vai o Tou nofo-mai, a ko te sapolepole o toku loto e se mafai o fakagata vagana ko te vai ola o toku fetaui mo Koe.  Tuku ifo, ki au, O toku Aliki, mai i te lagi o Tou alofa ke fakapilipili au ke pili atu ki te ipu o Au mea-alofa, kae fai aka au ke inu i te Uaina filifilia ko oti ne pono, Tena ponoga ko oti ne faka-matalatala i Tou igoa, kae mai i ei a te manogi gali o Ou aso ko oti ne folafola atu ki tua atu.  A koe, ite tonuuga, ko te MaukoloaKatoatoa, tela ko Tena kaimalie e seai se gataaga.  
A te univesi katoa e molimau ki Tou alofa-kaimalie.  Ke iai se alofa, tena la, ki luga ia au mai i Ou alofaaga, kae kilo alofa mai kia au mai i te maalosi o Tou nofoaiga-a-tupu, kae fai aka au ke fiaifia au o fakapilipili atu kia Koe mai i Ou alofaaga tuafia.  A Koe e tonu, ko te Tafasili i te Foai, ko te MafiKatoatoa, ko te Fakamagalo-Katoatoa, ko te Tafasili ite Maukoloa.

-Bahá'u'lláh
-----------------------

FAIFEKAU A TE ATUA (#12225)

E maluga a Tou igoa, O te Aliki toku Atua!  E molimau ne Koe me ia Koe e silia atu mai i luga o mea faiite katoa, a ko Tou alofakaimalie e sopoia atu i tino katoa i te lagi mo te lalolagi.  Kae kafai ko tonu ia Koe ke suke a te veli o Tou nofoaiga-a-aliki, kae ke vikia a Tau muna, kae ke fakaasi a Tou maukoloa mo te alofa-kaimalie, ne avaka ne Koe a Tau tavini tokotasi, kae fili a Ia mai i luga i Au mea faiite katoa, kae fakamatea aka loa a Ia tokotasi ona ko Tau pogai, kae fakapei a Ia ki te gatu o Tau takitakiiga, kae ufi a Ia i lalo i te tai o Tau aifioga mo te matagofie, kae faka-mmalu a Ia mai i mea katoa ko la seai ko te taua o Tou matagofie mo te maalosi o Tou mafi, kae fai atu kia Ia ke kalaga atu ki mua o latou katoa i te lagi mo te lalolagi, kae kami mai ate toko-ukega o tinio ki te Faifekau a Koe mo te Fakaasiiga o Au failoga.  
I taimi foki tena ne fakasalalau atu ne Ia a Tau Fakatokaaga, kae tu ki luga o fai a galuega ko la ne fakatonu atu kia Ia i Tapeleti o 
Tau fakatonuuga, kae oko ki luga i Au mea faiite a Toe Fakamataku Lasi.  A nisi ne fuli atu kia Koe, kae motu a latou mai i mea katoa vagana ko Koe, kae fakamana a olotou agaaga mai i te lalolagi mo mea katoa ko la i ei, kae ne to lasi a te fiafia ia latou i te suamalie o Tou leo te la ne ala i ei latou o liakina a mea katoa ko oti ne faiite ne Koe i Tau foafoaaga.  Ko nisi ne lavea ne latou a Koe kae ne fakatalave, ko nisi ne talia ne latou a te lalolagi ke vau i te va o latou mo Koe ko ala i ei o taofigina a latou i te lavea o 
Koe.  Ko nisi ne kilo fakatauemu kia Koe, kae fuli a olotou tua mai ia Koe, kae manako latou o fakalavelave a Tau galuega.  Kae e ui iei kilo aka kia latou katoa e kalaga atu kia Koe, kae fakatalitali ki mea ko la ne feagaiiga mai i Au tapeleti.  Kae i te taimi ne vau i ei a te Tokotasi te la ne Valogina kia latou, ne seki lavea ne latou a Ia, kae e se-talitonu i Au fakailoga, kae faka-see a Au alofaaga, kae olo seke kii loa mo Tou auala kae faka-see ne latou Au tavini, mai i luga i te malapulapu o olotou mata ne fakamaina i ei a mata o te Lukuuga mana faka-te-lagi.  
Au e akai kia Koe, O ko Koe Te la ko te Aliki o igoa katoa, ke leoleo Au fagasele mai i Ou fili, kae ke fak-maalosi a latou i te olotou alofa kia Koe mo te faka-taunuuga a te mea e fiafia Koe ki ei.  Puipui ne Koe a latou, ko olotou laga-a-vae ke se seke keatea, ko olotou loto ke se punitia pe la me ne pono ne se veli mai ia Koe, ko olotou mata ke se mae i te kiloga ki se mea vagana loa ko Koe.  Fai aka latou ke lasi i te fiafia mai i te magalogalo o Tou sikuleo faka-te-lagi te la ko motu i ei latou mai i kopikopiiga katoa vagana ko Koe, kae ka fuli katoatoa kia Koe, kae fakamaluga Koe i fakanofonofoga katoa, kae fai atu penei:  “Vikiiga e o Koe, O te Aliki te motou Atua, pe la loa mo Koe ko oti ne faka-mafai ko matou ke lavea a Koe a te tafasili i te matagofie mo te maluga.  
Matou, mai i luga i Tou alofa-kaimalie, ka piki mmau kia Koe, kae ka motu matou mai i so se mea na ko Koe.  Ko talitonu matou ia Koe ko te Fagasele o lalolagi mo te Tufuga o te lalolagi mo te lagi!”  
Te silisiliese io te Atua, ko te Aliki o te foafoaaga katoatoa!

-Bahá'u'lláh
-----------------------

FAIFEKAU A TE ATUA (#12226)

E lauefa a Tou igoa, O te Aliki toku Atua, pe la loa mo te faiga ne Koe au ke faka-logologo ki Tou leo, kae kalaga mai au kia Koe, kae tala oku mata ke kilo tonu ki Tou gali, kae fakamaina a toku loto i Tou poto, kae faka-manuia mai oku fatafata mai i falotolotolua o latou fakatupu fakalavelave i Ou aso.  Au ko te tasi, O toku Atua, te la ne moe kii loa i tena moega, kae poi atu, a faifekau o Tou alofa tuafia ko oti ne uga mai ne Koe ki lalo ia au, a ko te matagi faka-alofalofa o Tou alofa-atafai e agiagi i luga ia au, kae fago ne ia au ki luga, kae fai ko oku mata ke saga tonu atu ki te kogaa-koga tapu o Tou poto, kae fakammau oku mata ki te malifalifa o te mainaaga i Ou mata.  
Au se mea ola kae mativa, O te Aliki, Kilo mai kia au e piki mmau ki te kapa o te gatu o Tou maumea.  Au ne tele mai i te pouliga mo te nofo se-toka ki te mainaaga o te molii o Ou mata.  Moi fai Au – kae ko Tou matagofie e molimaugina –ne siki atu a te fakafetai kia Koe, mai i taimi ne faka-galue i ei a Tou maalo ki te leva o te lagi o Tau pulega, koi siki maua loa ne au o taui atu Au fakamanuiaaga se lausia.   
Au e akai totuli kia Koe, O toku Aliki, i Tou igoa, a te Kufaki Katoatoa, pe la foki mo Tou igoa te la ne fakeke mai ne Koe me ko toe mea faigaluega e fusi i ei a Koe mo Au tavini, ke talia mai ke mafai ne au o lele o lafi i Tou mataloa, kae talanoa atu Ou tavaeega.  Tusi ifo, tena la, mo au, i Ou lalolagi katoa, a te mea te la ka mafai i ei au o ulu mai lalo o Tou malu kae mai i loto i 
tuakoi o Tou fale. 
Koe, e tonu, ko te Mafi Katoatoa, ko te Tafasili i te Maukoloa, ko te Tafasili i te Maluga, e Fakamagalo Katoatoa, ko te Tafasili i te Kaimalie.

-Bahá'u'lláh
-----------------------

FAIFEKAU A TE ATUA (#12227)

Vikiiga e Koe, O te Aliki toku Atua!  I taimi katoa e masaua ne au a Koe kae mafaufau ki Ou uiga lei, Au e poko saale i se laumatagi kae fonu au i te fiafia ia Koe te la ko se maua ne au o faipati a Tou igoa kae fakamaluga a Koe.  Au ko lele ki tua ki koga maluga te la ko lavea i ei ne au me e pau mo te masausauga o Koe i Tou lalolagi, mo te tina vikiiga o Koe i vasia o Au tavini.  Me e pefea a te leva o te ola o Koe, me e pefea a te leva o te tumau o fakaoko atu Ou tavaeega ki tua atu i vasia o Au mea ola faiite mo Tou masausauaga ka vikia ne Au tagata a Koe.  
A so se tagata e ola mo te mafaufau matakite i va o Au tavini e fakamaalosi ia au e ola ki te se-gata mai kae e se-mafai o galo, pela foki loa mo te masausauga o Koe e favavau kae ka tumau pena ki te leva o te ola o Tou tina Tino, a ko Ou vikiiiga e favavau kae ka tumau pena ki te leva o Tou nofoaiga-a-aliki. Mai i te mea e mafai o fai a Koe e vikia ne latou ko Au tino filifilia ko la e kalaga atu kia Koe mo latou ko la e uiga fakamaoni i va o Au tavini.  Ikaai, a te tavaeega te la mai i so se tino, i te foafoaaga katoatoa, a te vikiiga tena kia Koe e vau mai i te fuaitino tafasili ite maluga tenei kae foki atu foki ki ei, pela loa mo te laa tela, e uiloa e maina, e oko atu a tena gali ki so se me te la e sae ki ona vae.  Mai i te laa tenei e vau i ei, kae foki atu foki ki ei, a te mainaaga te la e oko ki mea katoa.  
E maluga, e see maua o fua a te maluga o Koe mai i luga atu o so se taumafaiiga o fua a te mataefa o Tau Fakatokaaga, mai i luga atu o so se fakapauga e taumafai se tino o sala, mai i luga atu i taumafaiiga a so se laulaufaiva e faipati ki tena taua!  Mai loa ite vavau a Koe ko leva ne nofo mai, tokotasi aunoa mo se isi i Ou tafa, kae ka tumau, ki te favavau, o pena, i te tumu fakaotioti o 
Tou uiga tonu kae e se-mafai o okogina a te maluga o Tou silisiliese.  
Kae kafai a Koe e loto ke fakailoa a Koe ki tagata, ne fakaasi mai a Koe i te fakasae mai o Faifekau o Tau Fakatokaaga mai i taimi ki taimi, kae fakasino mai a latou taki tokotasi me ko te failoga o Tau Fakaasiiga i vasia o Au tino, mo te Aso Malulu o Tou tina Uiga tonu e se lavea i vasia o Au mea ola, ke oko ki te taimi te la, e tusia mai ne Koe, Au Fakaasiiga katoa mai mua ko tuku fakatasi katoa ia Ia Tela ko oti ne tofi ne Koe me ko te Aliki o latou katoa i te lagi o fakaasiiga mo te maalo o te foafoaaga, a Ia Tela ko oti ne faka-tumau ne Koe me ko te Tupu o Aliki o latou katoa i lagi mo latou katoa i te lalolagi.  Ko Ia Tela ko oti ne tofi ne Koe me ko te Takitaki ala o Tau Fakaasiiga Tafasili ite Takutakua mo te Fakailoa o Tou Gali Tafasili maiAnamua-loa.  I te mea tenei a Koe e seai aka foki se pogai na loa ko te taumafai kia latou ko la ko oti ne fakaasi Ou igoa tafasili i te llei kia latou katoa i te lagi mo te lalolagi. Ko Ia Te la ko oti ne fakatonu mai ne Koe ke fakatu a Tena feagaiiga mo mea faiite katoa.  
Kae i taimi ne fakataunu i ei a Tau valoaga mo te taimi tela ne tusia mai, a Ia Tela ko te Pule o Igoa mo Uiga llei katoa ko fakaasi atu ki tagata.  Mai i kona a mea katoa i lagi mo mea katoa ite lalolagi ne polepole i te mataku vagana ko latou ko la ne tausi ne 
Koe mai lalo i Tau puipuiiga kae tausi mai lalo i te maluuga o Tou maalosi mo Tau fuafuaga alofa.  I kona ne siga atu kia luga ia Ia, mai i lima o Au mea ola ko la ko oti ne agasala atu kia Koe, te la e seai se laulaufaiva o se isi o Au tavini e mafai o toe fakamatala.  
Kilo ifo, tena, kia Ia, O toku Atua, se kiloga o Tou alofa-kaimalie, kae tuku ifo ki lalo ia Ia mo latou ko la e alofa kia Ia a mea lei katoa ko oti ne fakatoka i te lagi o Tou finagalo mo te Tapeleti o Tau fakatonuuga.  Feasosoani kia latou, tena, mo Tau fakamafanafanaaga, me ia Koe, e tonu, ko te MafiKatoatoa, ko te Tafasili i te Maluga, ko te Matagofie-Katoatoa, ko te FakaofoofoginaKatoatoa.

-Bahá'u'lláh
-----------------------

FAIFEKAU A TE ATUA (#12228)

E maluga a Tou igoa, O toku Atua!  Au ko to kavegina ne te agiagi malielie o te matagi mai i Tou nofo-mai te la ko puli ia au aku mo mea katoa ko la e nofo mo au.  Mea nei se fakailoga o te faka-ofoofogina o Tou alofa-kaimalie mo alofaaga mataefa e tuku mai kia au.  Au e vikia a Koe, O toku Atua, me ko oti au ne fili ne Koe mai ia Au mea ola katoa, kae fai au pe la me ko te AsoMalulu o Tou maalosi mo te Faifekau o Tou mafi, kae fakamaalosi ke fakaasi atu Au failoga mo mea-alofa o Tau afioga mo te maalosi te la e seki ai aka loa, i Tou lagi io me ko Tou lalolagi, ne mafai o fai.  
 
Au e akai totuli kia Koe, O toku Aliki, mai i Tou igoa tafasili i te malifalifa, ke fakamasani aka oku tagata mo mea ko la ko oti ne fakasino ne Koe mo latou.  Tausi aka ne Koe, tena, mai i loto i te maalosiga o Tau takitakiiga mo te tapanekolo o Tau puipuiiga tela e mautakitaki.  Luku aka latou, O toku Aliki, i luga i te matafaga o te Vasa tenei, a motiga katoa taki tasi e fakasalalau ia Koe ko te Atua, te la mai ia Ia e seai aka foki se Atua, te Silisiliese-Katoatoa, te Atamai-Katoatoa.  
Suke aka mai i mua o latou, O toku Aliki, a te afioga o Tau Talitonuuga, ia latou mana takitakigina ke faletonu a Tou nofoaiga-aaliki mo te maalosi o Tou mafi.  Au e tauto i Tou matagofie, O ko Koe Tela ko te Fagasele o lalolagi!  Moi fai e iloa ne latou a Tou maalosi e fakapatonu atu me ia latou e se taitai o fai se pati ki se mea tela e seki fai mai mo latou i te lagi o Tou finagalo. 
Fakamaalosi a latou, O toku Aliki, mo se iloa o te olotou vaaivaiiga mai mua ia Ia Tela ko te Faifekau o Tou Uiga tonu, kae akoako a latou ke lavea ne latou a te mativa o te natula o latou i mata o alofaaga tuafia o Tou ola loa ia Ia mo te mau koloa, ko te mea ke luku fakatasi mai a latou fakasiomia i Tau Fakatokaaga, kae piki mmau ki te kapa o te gatu o Tou alofa, kae piki ki te kafanoa o te fiafiaaga–lei o Tou finagalo.  
A Koe ko te Aliki o lalolagi, mo latou katoa ko la e fakaasi ne latou a te alofa, ko te Tafasili i te Alofa-Kaimalie.

-Bahá'u'lláh
-----------------------

FAIFEKAU A TE ATUA (#12229)

Vikia a Koe, O te Aliki toku Atua! Au e akai kia Koe mai ia Latou Ko la ko Tapanekolo o Tou mana Faka-te-Lagi, Ko la ko Faifekau o Tou tafatasi tafasili i te gali mo Aso-Malulu o Au musumusuga faka-maalosi mo fakaasiiga, ke talia ko Au tavini ke se taofigia mai i te Tulafono Faka-te-Lagi tenei te la, i Tou loto mo tou fiafiaaga, ko maga atu mai i Tou vasa tafasili i te lasi.  Ko fakaeke aka ne Koe mo latou a mea ko la ko oti ne fakaeke ne Koe mo Au tino filifilia fakatasi mo latou fai mea tonu i vasia o Au mea faiite, ko la ko te tumau o latou i te Fakatokaaga ne seki maua ne matagi maalosi o lue,  kae ko la foki a gateteega o tofotofooga ne seai se maalosi lele o taofi a latou mai ite faka-lauefaga o Tau Muna tafasili ite maluga – te Muna tela mai i ei i lagi o manatu fakasupasupa mo mafaufauga seai ne aoga o tagata ne malepelepe mai lalo.  Ko Koe e tonu ko te Mafi-Katoatoa, ko te MatagofieKatoatoa, ko te Iloa Katoatoa.  
Faka-mafai, tena la, Au tavini, O toku Atua, ke lavea a te Fetu-Ao tela e maina mai i te sikulagi o Tau ikuuga mo te pogai e se mafai o mafulifuli, kae ke taofi latou mai i te Palataiso tela a Koe, mai i Tou igoa, ko te MatagofieKatoatoa, ko oti ne kalagagina i lagi o Tou puleega tafasili i te maluga. Fai aka foki a latou, O toku Atua, ke fakavave ki Tou leo tafasili ite suamalie, ko te mea ke fakavave katoa latou o atafia a Tou tafatasi kae lavea a Tou fakatasitasi. O ko Koe tela ko te Fagasele o loto katoa ko la e nnau kia Koe, kae ko te Pogai o te ava o latou pela mo te mea e iloa ne latou a Koe!  
Au e akai totuli kia Koe, mai ia latou ko oti ne motu ifo a tupua fakasupasupa i te Fakaasiiga tenei mai i ei ne sae mai a te Numi Tafasili i te Masei mo te Fakamataku Tafasili i te Lasi, o fesoasoani, i taimi katoa, Au tavini mo failoga o Tou maalosi katoatoa mo faka-talitonuuga o te maluga o Tou mafi-katoatoa.  Tuku ifo, ko olotou loto ke makeke pela me ne fiti, ko te mea ke tumau latou e se-gasuesue ona ko te mafi salalau tenei o soli tuakoi o teke a Ia Tela ko te Faifekau o Tou Tina Fuaitino mo te Aso malulu o Tou Tino e se lavea, ko latou ke tu katoa ki luga o tapuaki kae fesoasoani kia Koe, ko te mea mai i ei ka sau aka ki luga a fakailoga o 
Tou manumaalo i Ou lalolagi, a ko fuafuaaga o Tau Talitonuuga ka mafai o fakalauefa atu ki Ou fenua katoa.  A Koe ko Ia tela mai anamua loa ko oti, mai i te maalosi o Tena finagalo, kio te maalosi-katoatoa, kae ka tumau pena ki se-gata mai se-gata mai eiloa.  A Koe, e tonu, ko te Matagofie-Katoatoa, ko te Tafasili i te Maluga. E seai aka foki se Atua na ko Koe, ko te Tafasili i te Maalosi, ko te Tafasili i te Maluga, ko te Fesoasoani i Mea Faigata, ko te Tafasili i te Takutakua, ko te Tokotasi, ko te Se-Fakatusagina, ko te Matagofie Katoatoa, ko te Se-Mafai-o-Taofigina.

-Bahá'u'lláh
-----------------------

FAIFEKAU A TE ATUA (#12230)

Vikiiga i Tou igoa, O te Aliki toku Atua!  Au e molimau ia Koe se Kope funa e ufi i loto ia Koe mai loa ite vavau kae se Mea Fakaofoofogina e se mafai o matafi e nofo loto i Tou kanoloto o Tou faiitega.  E manakomia o fakaasi a Koe, a ko Koe ne kalaga atu ke mafua mai a te Lalolagi Matalasi mo te Lalolagi Foliki, kae fili ne Koe a Tagata mai i luga i mea faiite katoa, kae fai a ia pela me ko te failoga o lalolagi e lua kona, O Koe ko te motou Aliki, ko te Tafasili i te Alofa!  
Ne avaka ne Koe ke nofo i Tou nofoga mai mua o tino katoa o Tau foafoaaga.  Ne faka-mafai ne Koe a Ia ke faka-matala Au mea lilo, kae sulu maina atu mo te mainaaga o Tau musumusuga mo Tau Faaliga, kae folafola atu Ou igoa mo Ou uiga lei.  Mai ia Ia ne safe ne Koe a te ulu tala o Tau tusi o te foafoaaga, O Koe ko te Pule o te univesi te la ne fakafoliga ne Koe!  
Au e molimau me i Tena fuaitino a te mea makeke mo te suavai ko oti ne fusi tasi kae tapani fakatasi.  Mai i luga i Tena fatuatua ki Tau Fakatokaaga, mo Tena piki mmau ki so se mea te la ko Koe, i te uke o te mainaga o Tou matagofie, ne fakaasi atu ki Ona mata, mai i maalo katoa o Tau Fakaasiiga mo te foafoaaga, a agaaga o Au tavini ko fakagasue i te olotou nnau ki Tou Maalo, a ko latou ko la e nofo i Ou lalolagi ko fakavave ki loto i Tou maalo faka-te-lagi.  Mai i te nofo se toka ne fakaasi aka ne Ia iI Tou auala, a vae o latou katoa ko la e fakatuanaki kia Koe ne fakamakeke kae fakatalitonu o fakaasi a Tau Talitonuuga i vasia o Au mea ola, kae o fakaasi atu foki a Tou nofoaaiga-a-aliki i Ou maalo katoa.  
E pefea a te takutakua, O toku Atua, a Tou tugalima tafasili i te gali tenei, kae e pefea loa a te katoatoa o Tau foafoaaga, te la ne fai ne ia a so se loto malamalama mo te mafaufau ke ofo!  Kae i te taimi te la ko fakataunu, a ko te mea tela ko leva ne valogina ko oti ne fakataunu, a Koe ne faipati a Tou laulaufaiva o tavae a Koe, kae fakaasi fakalei Ou feitu lilo mai mua o Tau foafoaaga, O Koe ko Ia a te Pule o igoa katoa, mo te Tufuuga o te lalolagi mo te lagi!   Mai ia Ia a mea faiite katoa ne vikia a Koe, kae e fakamanatu a Ou vikiiga, a ko so se agaaga ne fakasino ki mua i te maalo o Tau Fakaasiiga mo Tau nofoaiga-a-aliki.  
I te taimi e tasi, Koe ne sisi aka a Ia ki luga, O toku Atua, kae fakapei a Ia ki te lakei o te igoa o Ia Tela ne sautala mo Koe (Mose), kae mai i luga ia Ia ne faka-matala a mea katoa ko oti ne fakasino mai i Tau finagalo mo mea ko la ko oti ne fakaiku mai i Tau pogai e se mafai o mafulifuli. I sua taimi, a Koe ne fakasafe a Ia ki te igoa o Ia Tela ko Tou Agaaga (Iesu), kae uga mai a Ia ki lalo mai i te lagi o Tou finagalo, mo fai a te akokaoga o Au tagata, tena e fagai a latou ki te agaaga o te ola ki loto o latou fakamaoni i vasia o Au tavini mo latou ko la e usiusitai i vasia o Au mea faiite.  I sua taimi foki, a Koe ne fakaasi kia Ia, faka-galigali ki te igoa o 
Ia Tela ko Tou Taugasoa (Muhammad), kae fai a Ia ke sulu maina mai i luga o te sikulagi o Hajaz, pela me se mea-alofa o Tou maalosi mo se fakatalitonuga o Tou mafi.  Mai ia Ia a Koe ne tuku ifo ki Au tavini a te mea te la ne mafai ne latou o kake-aka ki te maluga o Tou tafatasi, kae nnau olotou loto ki mea fakaofoofogina o Tou poto mo te atamai tuafia.  
Au e fakatalitonu, O ko Koe Tela ko te Aliki o te foafoaaga katoa, mo te Manakoga o so se tino ko oti ne sala kia Koe, te la, i vasia o Au mea faiite, e fakatusa a Latou ki te laa tela e faitalia me e pefea a te uke o taimi e fanaka io me e to e tumau loa a te iai mo te pau o te laa.  So se tino e faka-kese a vasia o Latou ko se maua ne ia a te tina pogai tonu, kae ke oko ki te koulu fakaoti loa, ko se maua ne ia mea faka-ofoofogina o te faka-tasitasi mo molii o te mana mo te tafatasi.  Au e toe molimau, ia Koe ko oti ne fakaiku mai me e seai i te laolagi nei e fakapau mo Latou, kae e seai foki ia Au mea ola e mafai o fakatusa a ia ki se isi o Latou, ko te mea ko Tou Tokotasi totino mo te seai-se-fakapaugina-lele loa e mafai o laveagia kae fakatumau.  
Vikiiga, tavaeega e se maua o lau mo Tou igoa, O toku Atua!  E mafai pefea o taku a Koe ki se tulaga e ttau io me o vikia a Koe fakalei, me ia Koe ko oti ne fakaasi a Ia mai i te maalosi o Tou mafi, kae fai a Ia ke maina atu i luga i te sikulagi o Tou finagalo, kae fai a Ia me ko te Aso-Foou o Au failoga, mo te Malumalu o te fakaasiiga o Ou igoa mo Ou uiga gali?  E pefea ate 
fakaofoofogina, tena la, O toku Atua, a Tena natula mo mea katoa ko la ko oti ne faulu ne Koe kia Ia, mai i luga i tou maalosi mo te maalosi o Tou mafi!  I taimi e tasi ne fakasae mai a Ia pe la me ko te vai o te Ola tonu loa, e aumai-gina mai ite lagi o Tou alofa, kae ligi ifo mai i kaumana o Tou alofakaimalie, ko Au mea ola katoa ke maua ia latou se ola fou, kae ke ola ki te leva o Tou Maalo.  So se motiiga o te vai tena e lava i ei o fakaola a tino ko oti ne mate, kae o fakasaga a olotou mata i te auala o Au alofaaga mo meaalofa, kae ke motu mai ia latou a te piki ki mea katoa na loa ko Koe.  I sua time foki ne fakaasi mai a Ia me ko te Afi te la ne fakaka ne Koe a te lakau ola o Tou tafatasi, tela a tena velaaga ne liua i ei a loto o Au fagasele maalosi i taimi a Ia Tela ko te FetuAo o te lalolagi ko sulu maina mai i te sikulagi o ‘Iráq.  Au e faka-talitonu, O toku Atua, te la mai ia Ia a veli o manatu valea o tagata ne fakaka, a ko loto o tagata ko fakasaga tonu ki te koga e nofo i ei a Tou matagofie tafasili ite taulekaleka.  
Au e akai fakamaoni kia Koe, O a Koe ko te Fakaekeega Tafasili i te Maluga, ke se liakina au mai i matagi iliili malie ko la e agiagi mai i taimi o Ou aso, aso ko la a te manogi suiti o te gatu o Tou alofa-kaimalie ko oti ne tufagtufa ki tua atu.  Io me taofi au ne Koe mai i Tou Vasa tafasili ite lasi, te la a so se motiiga e tasi mai iei e faipati mai penei: “E tafasili i te lasi a te famanuiaaga tela e faitali kia ia ko oti ne ala mai i tena moe ona ko te manavaaga o te Atua tela, mai i luga i Tena alofa-kaimalie, ko oti ne agina atu mai i luga o Ana mea ola katoa kae ko oti ne fakaagai kia Ia!”  
E lavea ne Koe, O toku Aliki, me e pefea Au tavini e taofi faka-pagota ne latou loa ia latou mo olotou manakoga.  Faka-magalo mai latou mai i olotou mafatiaaga, O toku Atua, mai i te malosi o Tou nofoaiga-a-aliki mo te mafi, ko te mea ke mafai ne latou o saga atu kia Koe i taimi te la a Ia ko te Fakaasiiga o Ou igoa mo uiga llei ka fakaasi atu ki tagata.  
Kilo alofa mai kia ia tenei e mativa kae nofo mao , O toku Aliki, a te kilo o Tou maukoloa, kae fakalofia a tena loto mo sulu o Tou poto, ko te mea ke mafai ne ia o puke a muna fakavae o te lalolagi e se lavea, kae maua ne ia a mea lilo o Tou maalo faka-te-lagi, kae atafia a fakailoga mo mea-alofa o Tou maalo, kae puke ki fakaasiiga e tua fia o te lalolagi tenei kae tuku atu i mua o Ia Tela ko te Fakaasi o Tina Koe loa.  Taki atu, tena la, ona mata, O toku Atua, ki luga i te sikulagi o Tou alofa-kaimalie, kae mautakitaki a tena loto i te piki kia Koe, kae faipati atu tena laulaufaiva o vikia a Koe, kae fakamafai ke maua ne ia o taofi ke mmau a te kafanoa o Tou alofa, kae ke piki ki te kapa gatu o Tou maukoloa, kae ke fakasalalau atu a Tou igoa i vasia o au mea faiite, kae ke toe lau atu Ou uiga gali ke salalau i koga katoa, i se auala tela e seai se mea e faka-lavelavegia ko se mafai i ei ne ia o fuli atu ki Tou igoa, ko te Maukoloa Katoatoa, kae e seai se veli e puni ne ia a ia mai ia Koe, Tela la i Ou lima e taofi i ei a te maalo ote faipati mo te maalo of igoa mo uiga lei katoa!  
Taofi ne Koe a te lima o ia tena e salasala tela ko oti ne fakatonu ona mata kia Koe, O toku Aliki, kae futi mai i te poko-oga o ona mafaufauga seai ne aogaa, ko te molii o te mautinoa tonu ke sulu maina i luga atu ote sikulagi o tena loto i aso ko la a te laa o te poto o Au mea faiite ko oti ne fakapouligina ona ko te sulu maina o te Fetu-Ao o Tou matagofie; a aso  te la a te masina o te atamai o te lalolagi ko segi mai i luga i te sae-maiga o Tou poto funa, mo te fakaasiiga o Tau mea funa tela e leoleogina fakalei loa, mo te fakasae maiiga o Tau mea funa, a aso ko la a fetu o mea e fai a tagata ko to ki lalo ona ko te fanaka ki luga o te tamilosaga o Tou tafatasi mo te fakalauefa atu o Tou fakatasitasi tafasili ite gali.  
Au e akai kia Koe, O toku Atua, mai i Tau Muna tafasili ite maluga te la ko oti ne fakeke ne Koe me ko te Foo Masaki Faka-te-lagi ki luga i tagata katoa i loto i tou maalo, te Foo Masaki te la a tena maalosi ne fuli i ei a te fiti o te olaga o tagata ki te tina aulo piua. O ko Koe i Ou lima e i ai a maalo e lavea mo te se lavea, ke fakatonu ko taku filifiliga ke olo tonu mo Tau filifiliga a ko toku manakoga ko Tou manakoga, a ko au ke lotomalie katoatoa mo te mea tela e manako Koe ki ei, kae ke fiafia katoatoa au mo te mea ko oti ne fakatonu ne Koe mo au mai i Tou maukoloa mo alofaga.  E tonu a Koe e fai a te mea e loto Koe ki ei.  Koe, i te tonuuga, ko te Matagofie-Katoatoa, ko te Atamai-Katoatoa.  
E fiafia a te tagata ko oti ne lavea, kae maua ne ia a te suamalie o Tou manogi kae fakasaga a ia ki Tou maalo, kae tami foki a ia i mea ko la ko oti ne fakapatonu i Tou gali mo te alofa. E lasi lasi a te faka-manuiaaga mo ia ko oti ne talia ne ia a Tou afioga tafasili i te maluga, ko la a veli ne pono i ei a maalo mai ia Koe ne seki mafai o ponotia a ia mai i te kilo o ona mata kia Koe, O ko Koe Tela ko te Tupu o te vavau mo te Fakaola o so se ivi vaaivai!  Fakamanuia, foki, a ia tela ne manava ne ia Ou manaogi gali, kae ko aveia ne Tau faipatiga i Ou aso.  Fakamanuia, foki, a te tagata tela ko oti ne fuli atu kia Koe, kae faka-fanoanoa kia ia tela ne fuli tua kia Koe.  
E vikia a Koe, ko te Aliki o lalolagi!

-Bahá'u'lláh
-----------------------

